മതം

എന്നെയും നിന്നെയും ഒന്നിലേക്ക് നയിക്കുന്ന
സ്നേഹമാകുന്ന ഒരു നദിയാണ് മതം
എന്റെയും നിന്റെയും ഹൃദയത്തിലെ ഇരുട്ട്
വെളിച്ചമാക്കാനുള്ള ഔഷധ ജലമാണ് മതം.

എന്നെയും നിന്നെയും സഹയാത്രികരാക്കുന്ന
മനുഷ്യത്വത്തിന്റെ തീവണ്ടിയാണ് മതം,
എന്നിലും നിന്നിലും സഹിഷ്ണുതയുടെ പൂക്കൾ
വിരിയിക്കുന്ന വസന്ത ഋതുവാണ്‌ മതം.

എനിക്കും നിനക്കും സ്വന്തമായുള്ളത് പങ്കിടാൻ
നമ്മെ സഹായിക്കുന്ന മധ്യവർത്തിയാണ് മതം,
എന്റെയും നിന്റെയും എന്നുള്ള ഭേദഭാവങ്ങളെ
വേരോടെ പിഴുതെറിയുന്ന കാറ്റാണ് മതം.

എന്നിലേയും നിന്നിലേയും കാമക്രോധമോഹങ്ങളെ
സ്ഫുടം ചെയ്തു നന്മയാക്കുന്ന അഗ്നിയാണ് മതം,
എനിക്കും നിനക്കും സത്കർമ്മങ്ങൾ ചെയ്യാൻ
നന്മതൻ പാതയൊരുക്കുന്ന പ്രേരണയാണ് മതം.

എന്നിലും നിന്നിലുമുള്ള അജ്ഞതയകറ്റുന്ന
ജ്ഞാനത്തിൻറെ സുവർണ്ണ ദീപമാണ് മതം,
എന്റെയും നിന്റെയും വിശ്വാസങ്ങൾ പരസ്പരം
ആദരിക്കാൻ ശക്തി പകരുന്ന ചൈതന്യമാണ് മതം.

എന്റെ വീടിനടുപ്പിൽ ഞാൻ വേവിക്കും മാധുര്യം
നിന്റെ ഉമ്മറത്തിണ്ണയിലെത്തിക്കാനെനിക്ക്
തുണയായി  ഏപ്പോഴും കൂടെയുണ്ടാവുന്ന
എന്നിലെ ആത്മവിശ്വാസമാണ് എനിക്ക് മതം

ഇക്കഥയറിയാതെ തമ്മിലടിച്ചുകൊണ്ടിരിക്കുന്ന
നീയും ഞാനും വെറും വിഡ്ഢികളല്ലേ?
മതമതീ ഭുവനത്തിങ്കലൊന്നല്ലോ മനുഷ്യത്വം
അതുണ്ടെങ്കിൽ വേണമോ നമുക്ക് മറ്റൊരു മതം

സുഹൃത്ത്

ആരാണ് യഥാർത്ഥ സുഹൃത്ത്. ഒന്നും പ്രതീക്ഷിക്കാതെ സ്നേഹിക്കുവാനും, ആപത്തുകളില്‍ കൂടെനില്‍ക്കുവാനും കഴിയുന്നവന്‍ ആയിരിക്കണം അല്ലേ. അങ്ങനെയുളള ഒരാളെ ഈ സമൂഹത്തില്‍കണ്ടുകിട്ടുക കുറച്ച് പ്രയാസമാണെന്ന് എനിക്കു തോന്നുന്നു. സാഹചര്യങ്ങള്‍ക്കനുസരിച്ച്നിറം മാറുന്നവരാണ് പലരും. പാരവെക്കുവാനും കുറ്റപ്പെടുത്തുവാനും ഒരുമടിയുമില്ലാത്തവര്‍.അതുമല്ലെങ്കില്‍ കാര്യസാധ്യത്തിനുവേണ്ടി ഒത്തുകൂടും. അതു കഴിയുമ്പോള്‍ കറിവേപ്പിലപോലെ നമ്മളെ പുറംന്തളളും. എനിക്കു പരിചയമുളള പലരുടേയും അനുഭവങ്ങള്‍ കണ്ടാണ്ഞാനിത് പറയുന്നത്. എത്ര അമൂല്യമായബന്ധമാണ് സൗഹൃദം. പരിശുദ്ധമായ സ്നേഹത്തിന്റെ പുതിയ പുതിയ മേച്ചില്പുറങ്ങളിലേക്ക് അത് നമ്മളെ കൊണ്ടുപോകുന്നു. എങ്കിലും ഏതൊരു വ്യക്തിയും അവന്റെ ചങ്ങാതിമാരോട് ചിലമര്യാദകള്‍ പാലിക്കേണ്ടതുണ്ടെന്ന് എനിക്കു തോന്നുന്നു. ഇത്എന്റെ ചിലതോന്നലുകളാണേ.

1) സുഹൃത്തുക്കളുടെ രഹസ്യങ്ങള്‍ ഒരിക്കലും പരസ്യമാക്കരുത്.

2) സുഹൃത്തുക്കളെ ഒരവസരത്തിലും ഒറ്റിക്കൊടുക്കരുത്.

3) സുഹൃത്തുക്കളെ ഒരിക്കലും പാരവെക്കരുത്.

4) താന്‍എങ്ങനെയാണോ അത്രതന്നെ പ്രധാന്യം സുഹൃത്തിനും നല്‍കണം

5) സുഹൃത്തിന്റെകുടുംബം സ്വന്തം കുടുംബം പോലെ കരുതണം.

6) ഞാന്‍ ഏല്ലാംചെയ്യുന്നു. പക്ഷെ അവന്‍ എനിക്കൊന്നും ചെയ്യുന്നില്ലല്ലോ, എന്നിങ്ങനെയുളള പ്രതിക്ഷകള്‍ സൗഹൃദത്തില്‍ ഉണ്ടാവരുത്.

7) സുഹൃത്തിന്ഒരാപത്ത് വരുമ്പോള്‍ ഒഴിഞ്ഞുമാറാതെ കൂടെ നില്‍ക്കണം.

8) സുഹൃത്തിന്റെഅനുവാദമില്ലാതെ ഒരിക്കലും അയാളുടെ സ്വകര്യതകളിലോ,കുടുംബ പ്രശ്നങ്ങളിലോ തലയിടരുത്.

9) പരസ്പരം കുറ്റംപറയരുത്.

ഓര്‍മ്മിക്കുക – സൗഹൃദം മഹത്തായ ഒന്നാണ്.ഫേസ്ബുക്ക് പോലുളള നെറ്റ് വർക്കുകൾപോലും ഉണ്ടായത് സൗഹൃദത്തെ അവലംബിച്ചാണ്.എന്താണ് നിങ്ങളുടെ അഭിപ്രായം.

സ്നേഹമാധുര്യം

ഓരോ ദിവസങ്ങളും എന്തെല്ലാം അനുഭവങ്ങളാണ് നമുക്ക് സമ്മാനിക്കുന്നത്. സന്തോഷവും ദുഖവും ഇടകലർന്ന, നന്മയും തിന്മയും ഉൾക്കൊള്ളുന്ന, പല അനുഭവങ്ങൾ. ഇവ ഓരോന്നും നമ്മളിലുണ്ടാക്കുന്ന വികാരങ്ങളും വ്യത്യസ്തമല്ലെ. ചിരിച്ചും ദേഷ്യപ്പെട്ടും. കരഞ്ഞും സന്തോഷിച്ചും, വേദനിച്ചും സാന്ത്വനപ്പെട്ടും അങ്ങനെ നമ്മുടെ ജീവിതത്തിന്റെ ഓരോരോ നിമിഷങ്ങളായി കടന്നുപോവുന്നു. അങ്ങനെ നമ്മളറിയാതെ ഒരു ദിവസം മരണം കടന്നുവരികയും ചെയ്യുന്നു. ഈ ക്ഷണികമായ യാത്രയിൽ നല്ല ഓർമ്മകൾ ജീവിതാന്ത്യം വരെ നമ്മുടെ കൂടെയുണ്ടാവും. ഈ ഓർമ്മകളിലൊക്കെയും സ്നേഹം പഴങ്ങളിൽ പഞ്ചസാര എന്നത് പോലെ ചേർന്ന് കിടക്കും. ഒപ്പം നല്ല സൗഹൃദത്തിന്റെ ഒരു അടിക്കുറിപ്പും. അതാണ് സ്നേഹത്തിന്റെ വില. നമുക്ക് പറഞ്ഞറിയിക്കുവാനാകാത്ത മാധുര്യമുണ്ട് ഈ വികാരത്തിന്. അതുകൊണ്ടു തന്നെ നമുക്കുണ്ടാവുന്ന അനുഭവങ്ങളുടെ ചേരുവകളിലേക്കു സ്നേഹം നമുക്ക് കൂടുതലായി ചേർത്ത് നോക്കാം. ഒരുപക്ഷെ ജീവിതത്തിനു ശാന്തിയും സമാധാനവും കൊണ്ടുവരാൻ അത് സഹായിച്ചാലോ. അതുകൊണ്ടു തന്നെ ആരെയും വെറുപ്പിക്കാതിരിക്കുക.സ്നേഹത്തോടെ നല്ല മനസ്സോടെ സമൂഹവുമായി ഇടപഴകുക. സൗഹൃദത്തിന്റെയും ബന്ധങ്ങളുടെയും വില മനസിലാക്കുക. 

നല്ലൊരു ദിവസം ആശംസിക്കുന്നു. 

സ്നേഹത്തോടെ ശിവദാസ്